Вялікдзень

Вялікдзень- найвялікшае каляндарнае свята, якое складае выключную адметнасць і самабытнасць беларускага святочнага календара.
У старажытнасці “Вялікі дзень” быў сустрэчай Новага года па сонечнаму календару і святкаваўся ў дзень веснавога раўнадзенства Але з пашырэннем хрысціянства прыстасаваны да Пасхі і стаў перасоўным святам ад 4 красавіка да 8 мая. У гэтым годзе праваслаўныя хрысціяне адзначаюць Вялікдзень 16 красавіка. З велікоднага тыдня пачыналіся веснавыя гульні і карагоды, дні ўшанавання продкаў, качанне і біццё яек. Да свята старанна рыхтаваліся. Галоўным момантам падрыхтоўкі святочнага стану душы да Вялікадня быў перадвелікодны сямітыднёвы пост. Велікодная ноч з суботы на надзелю-святочная, калі не спалі, фарбавалі яйкі, пяклі пірагі, рыхтавалі “паску”, якую асвячалі ў царкве. Зранку пасля богаслужэння ў гонар уваскрэсення Хрыстова тройчы віталіся радаснай навіной: “Хрыстос уваскрэс!”- цалаваліся.
Школьны музей матэрыяльнай і духоўнай культуры “Скарбы” віншуе Вас са Светлым Вялікаднём!
Жадаем моцнага здароўя, дабрабыту, светлых мар Вам і Вашым сем’ям.

Скарбы чароўнага куфэрка

         У кожнага народа, як і ў кожнага чалавека, свой характар, свой адметны лёс, сваё непаўторнае месца сярод іншых народаў. Кожны народ, адчуўшы сваё высокае прызначэнне ў чалавечай супольнасці, узбагачае яе найлепшымі духоўнымі дарамі, сабранымі за стагоддзі свайго гістарычнага існавання ў самабытную скарбонку вусна-паэтычнай творчасці і фальклору. Нібы дзіўны, неўміручы набытак перадаюцца гэтыя дары з пакалення ў пакаленне. І як хваля шліфуе непадатлівыя камяні, так мудрасць народная адшліфоўвае вякамі легенды і паданні, казкі і песні, прымаўкі і загадкі, мудрагелістыя скорагаворкі і зіхоткія пацешкі.

         Знаёмячыся з імі, яшчэ раз пераконваемся, што наш народ ніколі не траціў веры ў чалавечую дабрыню, сумленнасць і спагадлівасць. Засяваў вясновую раллю ўраджайным зернем, але не забываў засяваць сэрцы сваіх нашчадкаў адборным зернем справядлівасці, чалавечай годнасці і дабрыні. Падсілкоўваючы іх мудрымі россыпамі дасціпных жартаў, усмешак, спавіваючы іх у светлыя сувоі тонкага гумару.

         Для  знаёмства з беларускім фальклорам да  вучняў 3 «Д» класа завітала чараўніца з чароўным куфэркам, напоўненым легендамі, казкамі, загадкамі, жартамі. Гучалі легенды пра зубра, бусла і зязюлю, узгадалі народныя святы з песнямі і традыцыямі, знайшліся адгадкі на ўсе загадкі, смяяліся над жартамі, пагулялі ў гульню «Сляпы музыкант». Завершылася сустрэча  праглядам мультыплікацыйнага фільма “Ліса, мядзведзь і мужык”.

         Ад знаёмства вучні засталіся задаволеныя, упэўненыя ў тым, што такія творы мог стварыць толькі духоўна багаты, неабдзелены прыродным талентам, мужны і мудры народ – беларусы.

Загадчык бібліятэкі Худалей Г.М.